బడి వైపు ప్రగతి వైపు

(జూన్12 ప్రపంచ బాలకార్మికుల
వ్యతిరేక దినోత్సవం సందర్భంగా)

బడిలో ఉండాల్సిన
బాలలు పనుల్లో ఉండొద్దు
ఆటపాటల వయసులో
పిల్లల హక్కులను
హరించ వద్దు

చిరునవ్వులు చిందించే
పెదవులపై చింతల
నిప్పులు పోయద్దు

ఆటపాటలతో సాగాల్సిన
బాల్యాన్ని అంగట్లో
సరుకుగా మార్చవద్దు
బడికి వెళ్ళే భాగ్యం లేక
బతుకు భారమై సాగుతున్న
బాలల బాల్యాన్ని
చీకటి గుహగా మార్చద్దు

పుస్తకాలు పుట్టాల్సిన
చేతులకు సుత్తెలు
కొడవళ్ళు గడ్డపారలు
ఇవ్వద్దు
పశువుల కాపరిగా
మార్చద్దు

బడిబాట పట్టాల్సిన
పాదాలను బండ చాకిరి
వైపు నడిపించ వద్దు
ఇటుక బట్టీల సెగల మధ్య
కరిగిపోతన్న బాల్యాన్ని
బడినీడలో రక్షించాలి

హోటల్లో ప్లేట్లు కడిగి
శ్రమ దోపిడీకి నలిగిపోతున్న
రేపటి తరానికి ఆశా వహ
జీవితాన్ని ఇవ్వాలి

బాలల కలల రెక్కలను
తెంచవద్దు వారి ఊహలను
చిదిమేయ వద్దు
రసాయనాల ఫ్యాక్టరీ
పొగల్లో ఊపిరి ఆడని
బాల్యం ఆకలి కేకలతో
ఎక్కువ పనిగంటలు
పనిచేస్తూ కంపెనీల్లో
బూడిద పాలవుతున్న
అనారోగ్య బాల భారతం

పొగచూరిన ఫ్యాక్టరీల
గోడలమధ్య పసిప్రాణాలను
బలిపెట్ట వద్దు

బాణ సంచా మందు గుండు‌
తయారీ వెనుక వారి పచ్చని
బతుకులను కాల్చవద్దు

అమ్మ ఒడిలో పెరగాల్సిన
చిన్నారులు ఆనాదాల్లా
శ్రమిస్తుంటే చూడవద్దు


అక్షరాల వెలుగులు
చూడాల్సిన కళ్ళను
కన్నీటి సముద్రంలో
ముంచకండి

బాల్యం అనేది దేవుడి ఇచ్చిన
వరం దానిని తుంచడం నేరం

చదువే బాలలకు ఆయుధం
అదే దేశానికి శ్రీరామరక్ష
బాల కార్మికుల శ్రమ
దోపిడీకి చరమగీతం
పాడుతాం
బాల కార్మిక నిర్మూలన
చట్టాలపై అవగాహన
చైతన్యం పెంచుకుందాం
బాలకార్మిక రహిత
సమాజాన్ని నిర్మిద్దాం
ప్రతి బిడ్డకు చదువుల
వెలుగులిద్దాం.

బాలలు బడి వైపు
సమాజం ప్రగతి వైపు
వెళ్ళే సామాజిక
వాతావరణం సృష్టిద్ధాం

బాలలు రేపటి పౌరులు‌కాదు
నేటి పౌరులే అన్న స్పృహతో బాలల సర్వతోముఖాభివృద్ధికి
ప్రభుత్వం పౌరసమాజం
ఉపక్రమించాలి.

నేదునూరి కనకయ్య
అధ్యక్షులు
తెలంగాణ ఎకనామిక్ ఫోరం
(బాలకార్మిక వ్యవస్థ పై
పరిశోధకులు)
మాజీ ఎన్ ఎస్ ఎస్ అధికారి
కరీంనగర్9440245771