పర్యవేక్షణ లోపమా..? ఇష్టారాజ్యమా..?

తెలంగాణ తొలి ముఖ్య‌మంత్రి కేసీఆర్ ఇంటింటికీ తాగునీరందించేందుకు ఎంతో ప్ర‌తిష్టాత్మ‌కంగా చేప‌ట్టిన ప‌థ‌కం మిష‌న్ భ‌గీర‌థ‌. కాంగ్రెస్ స‌ర్కార్ అధికారంలోకి వ‌చ్చిన త‌ర్వాత మిష‌న్ భ‌గీర‌థ పైప్‌లైన్ల‌పై నిర్ల‌క్ష్య వైఖ‌రి చూపిస్తున్న ఘ‌ట‌న‌లు రాష్ట్ర‌వ్యాప్తంగా ఎక్క‌డో ఒక చోట వెలుగులోకి వ‌స్తూనే ఉన్నాయి.గ్రామాలకు సరఫరా అయ్యే మిషన్ భగీరథ మంజీరా తాగునీటి ప్రధాన పైప్ లైన్ పై కప్పు పగిలి తాగునీరు వృధాగా పోతుంది. సంగారెడ్డి జిల్లా హత్నూర మండలం మంగాపూర్ బస్సు స్టేజి సమీపంలో సోమవారం సాయంత్రం చోటుచేసుకుంది. పైప్ లైన్ కు బిగించిన నీటి నియంత్రణ వాల్ పైకప్పు పగిలిపోవడంతో తాగునీరు వృధాగా పోయింది. కాగా తరచూ అదే ప్రాంతంలో లీకేజీలు అవుతుండటంతో మరమ్మత్తు పనులు నాణ్యతగా చేపట్టాలని పలువురు కోరారు.అధికారుల పర్యవేక్షణ లోపమా..? లేక కాంట్రాక్టర్ల ఇష్ట రాజ్యమా..? తెలియదు కానీ పదేపదే పైప్ లైన్లు పగిలిపోయి తాగునీరు వృధా అవుతుండ‌టంతో ప్రజలు అధికారుల తీరుపై మండిపడుతున్నారు. మరమ్మత్తు పనులు నాణ్యతగా చేపట్టి ఉంటే మాటిమాటికి పైప్‌లైన్ లీకేజీ కాకుండా ఉంటుందని అభిప్రాయం వ్యక్తం చేస్తున్నారు.